Naglista it panibag-ong kadaeag-an ro onga ni dating Senador Manny Pacquiao nga si Jimuel Pacquiao matapos nga piyerdihon via decision si Dylan Merriken sa bakbakan nga ginhiwat sa Quiet Cannon Conference and Event Center sa Montebello, California kahapon, adlaw it Biyernes.
Ro kadaeag-an it 21-anyos nga si Pacquiao sa three-round bout hay bilang pagbangon sa anang unang career loss ko nagtaliwan nga buean it Hunyo kontra sa American nga si Chris Smith.
Sa makaron, buyot eon ni Jimuel ro 4-1 win-loss record.
Personal mang nagpamantaw sa ringside sa hampang it panganay it boxing legend ro ina nga si Jinkee ag ro mga igmanghod nga sanday Mary Divine Grace ag Queen Elizabeth ag ro MP Promotions president nga si Sean Gibbons.
Aminado man si Jinkee nga mas ginakuebaan raya it husto sa hampang it onga kumpara sa mga dating hampang it mister.
Samtang, si Jimuel hay nagapaidaeom sa training sa sikat nga Wild Card Gym sa alima it kababayan nga trainer nga si Marvin Somodio.
