KALIBO, Aklan — (Update) Nagapangatubang sa reklamong pag-eabag sa R.A. 9165 ukon Comprehensive Dangerous Drugs Act of 2002 ro sangka job order employee it lokal nga gobyerno it Kalibo matapos nga madakpan sa ginpatigayon nga anti-drug operation ag makumpiskahan it pilang sachet it suspected shabu, hapon it Biyernes, Agosto 16 sa sangka kapilya sa Purok 1, Barangay Tinigao, Kalibo sa kasagsagan it selebrasyon it kapistahan sa nasambit nga lugar.
Suno kay P/Maj. Frenzie Andrade, hepe it Provincial Drug Enforcement Unit (PDEU-Aklan) nga mabuhay man nga tiempo nga ginsubaybayan nanda ro suspek nga si Niño Joy Inguillo, alyas Nin, 43, may asawa, sangka utility staff it LGU-Kalibo ag residente it Crossing Buswang apang presenteng naga-istar sa Brgy. Tinigao, Kalibo.
Ginpatigayon it mga operatiba it PDEU ro buy-bust operation kontra sa suspek matapos raya nga makipag-transaksyon kanda.
Naga-abot sa 15 nga sachet it suspected shabu nga nakasueod sa sangka kaha it posporo nga nagabalor it kapin sa P23,000 ro nakumpiska halin sa suspek kaibahan ro sambilog sangka sachet nga nabakae kana, P1,500 nga marked money ag iba pang non-drug items.
Ginpahayag pa ni Maj. Andrade nga ro suspek hay dating drug surrenderee ag makabig raya nga sangka High Value Individual (HVI) bangud nga empleyado raya it gobyerno.
Ginpahayag dugang nga nagsukoe ag nagpaeagas pa ro suspek rason nga nakaangkon it nina sa anang uyahon matapos nga madusmo.
Hugut nana nga ginpamalibaran nga imaw ro nagapanag-iya it mga narekober nga droga kana.
Matapos nga maaresto hay ginkulong raya sa custodial facility it Kalibo Municipal Police Station ag ginpaidaeum sa nagakaigo nga proseso.
