KALIBO, Aklan — Sang adlaw bago ro temporaryong pagpasara sa isla it Boracay, nagpatigayun it review ag simulation it security plan ro mga pulis, suldado, coast guard ag iba pang law enforcers bilang pagpahaum sa anumang posibling matabo sa sueod it haeos an-um nga bueang closure order.
Pila sa mga gina pahauman ro paeag nga pwedeng matabo hay ro hubeag-protesta, pag eugdang it baruto, pag-atake it mga terorista ag ro iligal nga pagsueod it mga turista.
Hugot ro pagbantay sa makaron it kapin sa 630 tropa it gobyerno eabi eon ro mga indibidwal nga naga pasueod sa isla nga indi maga agi sa Caticlan jetty port.
Todo-bantay man sanda sa outer border control areas kapareho it Tabon port, Caticlan port, Sambiray Cargo Port ag Union, Nabas.
Naka-standby eonman sa makaron ro barko it Philippine Coast Guard nga BRP Cabra sakay ro haeos 40 personnel.
Sa sangka press conference gin pahayag ni PNP Deputy Chief for Operations Deputy Director General Fernando Mendez Jr. nga ro andang gin hiwat nga capability exercises hay agud maipakita rp kapabilidad it mga pulis ag suldado agud mabantayan ro isla.
Sa isla sigon sanda agud suportahan ro adbokasiya ni Pangueong Rodrigo Duterte nga eowason ro Boracay para sa kamaeayran it ulihing henerasyon.
Si Duterte eamang sigon ro nakaangkon it kabaskog it buot agud ipakita ro anang malasakit sa gina pabugae nga tourist destination sa nasyun nga ipaidaeum raya sa rehabilitasyon.
