KALIBO, Aklan — Sang adlaw antes ro uman nga pagbukas it Boracay sa publiko, uman nga nagpatigayon it capability demonstration ro Joint Task Force Boracay nga ginpangunahan mismo ni PNP Chief Director General Oscar Albayalde.
Suno kay Dir. Gen. Albayalde nga kaparte raya it pagpahaom para sa nagkaeain-eain nga scenario agud masigurong magiging eowas ro tanan engkasong makaangkon it anumang problema.
Kaeakip sa mga sitwasyon nga ginapahauman hay ro crowd disturbance management ag crisis management.
Ginpakita it nagkaeain-eain nga law enforcement agency kaparehas it Philippine Coast Guard, Philippine Navy ag Philippine Army ro kahauman sa pagresponde sa anumang scenario.
Ginpasiguro it pulisya nga nakahaom sandang pangalagaan ro seguridad sa uman nga pagbukas it Boracay.
Sa pihak nga parte, pagabantayan eon man it PNP ro mga turistang maga-eabag sa ginapatuman nga ordinansa sa isla kapin eon ro pagpilak it basura.
Nasayuran nga an-om nga bueang ginpasarado ro Boracay halin ko Abril 26 agud taw-an it daean ro paglimpyo ag rehabilitasyon kasunod it pagtawag ni Pangueong Rodrigo Duterte nga cesspool ro kaeawran it isla.
