KALIBO, Aklan—Bukas makarun ro Junior Chamber International ukon JCI Kalantiao para sa mga pamatan-on nga naga-usoy it masudlan nga organisasyon nga nagabulig sa komunidad.
Suno kay JCI Aklan Kalantiao President Dexter Tabya nga ro JCI Kalantiao hay sangka non-profit international non-governmental organization kung sa siin ro mga miyembro hay naga edad it 18 hasta 40 anyos.
May una man rayang mga miyembro sa kapin sa 124 ka mga nasyon sa bilog nga kalibutan ag regional ukon national organizations ro kaabuan sa mga raya.
Ro pinaka-una nga local Junior Chamber chapter hay nag-umpisa ko 1915, apang ro international umbrella organization Junior Chamber International (JCI) hay ginlunsar sa Mexico ko dag-on 1944.
Samtang dag-on 1973 hay nag-abot eun ro JCI sa probinsya it Aklan apang opisyal nga nag-umpisa ko 1974.
Bangud kara maabo eun nga mga proyekto ro nasambitan nga organisasyon nga nakabenipisyo ro mga pamatan-on ag kamana man sa komunidad.
Sa makarun nga termino hay may mga ginpatigayon sandang Tree planting activity, leadership training ag seminars.
Nasayuran dugang nga kada dag-on hay nagabaylo sanda it andang Presidente kung sa siin magadumaea eamang it sangka termino ro magapungko nga Presidente agud maipatuman ro anang advocacy.
