SPORTS News — Nagapameligro nga indi makahampang ro Gilas Pilipinas import nga si Justin Brownlee kaibahan ro national team sa 2025 FIBA Asia Cup.
Raya hay matapos nga nagguwa ro ikaywa nga posible nga doping violation nga posible nga mangin rason nga indi imaw makaibahan sa tournament sa Saudi Arabia nga maga-umpisa eon sa Agosto 5-17.
Mismo si Samahang Basketbol ng Pilipinas (SBP) president Al Panlilio ro nagkumpirma nga nabaton eon it national federation ro notice it adverse analytical finding (AAF) sa sambilog sa mga random tests kay Brownlee.
Ro notification hay ro pagpositibo sa substance nga una sa lista it mga ginabawae it World Anti-Doping Agency.
May bukon pa it kumpirmado nga reports nga nagahambae nga ro test hay angot sa paggamit it recreational drug, apang owa pa it statement halin sa kampo it naturalized star.
Apang suno sa SBP, gina-asikaso eon ni Brownlee ro isyu kaibahan ro anang legal team nga nakabase sa Estados Unidos.
Kun ma-suspende si Brownlee, raya eon ro anang ikaywa nga kahigayunan nga madugangan ro anang suspensyon nga angot sa iligal nga droga.
Madumduman nga pagkatapos nga ginpangunahan kara ro gold medal win it Pilipinas sa Asian Games sa China ko 2023, ginkumpirma man nga nagpositibo imaw sa Carboxy-THC nga sangka compound nga gina-angot sa cannabis. Kasunod kara, gindugangan it tatlong buean ro anang suspensyon sa anuman nga organized basketball.
Kat nakabalik, uman nana nga ginpangunahan ro Gilas eakip ro makasaysayan nga Olympic Qualifying Tournament run sa Riga, Latvia, ag ro dominant run sa Asia Cup Qualifiers nga imaw ro nagtau it spot sa Pilipinas sa main tournament sa Agosto.
Engkaso nga indi maka-ibahan ro native it Tifton, Georgia sa Gilas, nauna eon nga nagguwa ro pangaean ni Ange Kouame nga sangka naturalized player nga magabueos kana.
