KALIBO, Aklan–Dapat nga magpatuman it wealth tax sa tanan nga mga manggaranon nga pamilya sa nasyon agud nga makatipon it dugang nga pondo para sa gobyerno.
Raya ro naging panindugan ni presidential candidate ag labor leader ka Leody de Guzman sa Comelec-KBP PiliPilipinas Forum 2022 kaibahan ro anang vice presidential candidate nga si Walden Bello.
Suno kay de Guzman nga pagatutukan it anang gobyerno engkaso nga swertehon sa maabot nga mayo 9 nga eleksyon ro kamaeayran it kaabuan nga mga kubos nga Pilipino sa patag it ekonomiya, pangabuhian , ikamayad nga eawas , edukasyon ag reporma sa pagbuwis.
Kaibahan pa sa anang plano ro pagpabaskog sa labor unions, punduhon ro kontraktwalisasyon pinaagi sa pagbungkag sa mga manpower agencies ag ibalik ro dating patakaran nga “direct hiring” ag ro pagpatuman it mataas ag paeariho nga sweldo sa bilog nga nasyon.
Plano man nanda ni bello nga magtaeana it kapin sa 125-billion pesos nga pondo agud nga buligan ro mga micro, small, medium enterprises agud nga makatau it trabaho sa maabu nga mga tawo.
Dapat man suno kana nga pabaskugon ro agrikultura ag industriya agud nga indi masyadong magsalig sa importasyon.
Pagawakasan man sigon nana ro rice tariffication nga nagapa-antus sa mga mangunguma.
Ro mga basic services suno kana kapareho it tubi ag elekstrisidad hay dapat nga ginabuytan it gobyerno ag bukon it pribadong sektor bangud nga raya ro ugat it kapigaduhon sa nasyon.
Sa pihak nga parte, sa anang foreign policy, ginaduso nana nga makipagkasugot eamang sa mga nasyon nga nagakilaea sa atong soberenya ag territorial integrity.
Dapat sigon nga maging patakaran it nasyon nga makaangkon it patas ukon may mutual benefit sa tunga it atong mga partners.
