BALITA Espesyal–Masobra sa 250 nga kababayin-an sa China nga may mahabang buhok ro nakalista it Guinness World Record matapos sanda nga mag-ililiba ag ginsudlay ro buhok it kada isaea.
Nagtipon ro mga Red Yao women sa Huangluo Yao Village sa Longsheng Autonomous County, Guilin, China ko Abril 22 para makabilog it “Longest Hair Combing Chain” sa bilog nga kalibutan.
Ro nasambit nga record breaking attempt hay kaparte it dag-unan nga “Longji Long Hair Festival” it mga Yao people sa China.
Suksok ro andang traditional costume, dueueungan nga nag agto ro mga Red Yao women sa suba kun sa siin pagahiwaton ro record breaking attempt.
Samtang nga nagatikang paagto sa suba, ginakanta nanda ro “Long Hair Ballad”, sangka tradisyunal nga kanta nga ginakanta kada ‘Longji Long Hair Festival’.
Sa bibi it suba, nagbilog it human chain ro 256 Red Yao women ag nag-umpisa sanda nga sudlayon ro buhok sa andang prente gamit ro sudlay nga himo sa kahoy.
Ro mga Red Yao hay miyembro it mga Yao people, sambilog sa mga ethnic minorities sa China.
Umpisa pa ko sinaunang paniempo, ro mga kababayin-an it Red Yao hay may tradisyon nga pahabaon ro andang buhok.
Sang beses eamang sanda pwedeng magpa-utod ag raya hay sa edad nga 18.
Pagpati it mga Red Yao women nga ro mahabang buhok hay nagasimbolo sa mahaba ag manggaranon nga pagpangabuhi.
Ginadahanan nanda it mayad ro andang mga buhok ag may mga sekreto sandang pamaagi kon paalin raya nga alagaan.
Sambilog sa ginapabugae it mga Red Yao women hay owa it maskin sambilog kanda ro nakaangkon it puting buhok maskin nga sanda hay may edad eon.
Pagkatapos it record breaking attempt kun sa siin nakabilog sanda it 456 human combing chain, ginkumpirma it Guinness organization nga napasaalima eon it mga Red Yao women ro world record title.
