KALIBO, Aklan—Naga-ugyon ro Kabataan Partylist para sa pag angkon it general wage increase kasunod it nagatinaas nga presyo it mga nagapangunang baeak-eon ag serbisyo sa nasyon.
Suno kay Rep. Raoul Manuel nga ro labor force sa Pilipinas eabi eon ro mga pamatan-on hay ro lifeblood it nasyon rason nga nagakabagay eamang nga mataw-an sanda it mayad ag patas nga working conditions.
Panawagan pa nana sa Malacañang nga magpaguwa it Executive Order para sa umento sa sweldo ag i-certify bilang urgent ro mga kapareho nga laye para kara.
Ginaduso makaron sa manaba nga kapueongan it kongreso ro pag angkon it P750 nga minimum wage sa bilog nga nasyon agud nga maabot ro ginatawag nga living wage ukon ro sweldo hay bastante agud nga mabuhi ro sangka pamilya.
Samtang, dismayado man ro kongresista bangud nga ro gobyerno ro nagapanguna gihapon nga nagapatuman it contractualization nga bukon it manami nga halimbawa ag iba pang kompaniya.
May mga nakapending sigon sanda nga bills angot sa pagpapundo sa contractualization nga nagatuyo nga maprotektahan ro kinamatarung it mga obrero nga magtukod ukon magpasakop sa mga union.
Samtang, nakataeana man nana nga iga file ro magna carta of BPO workers.
