KALIBO, Aklan – – – Arestado ro sangka 35 anyos nga kabidor it saklaan sa anti-illegal drugs operation nga gin patigayun kaina it alas-5:30 it agahon sa Diversion Road, Tabayon, Banga.
Ro suspek hay gin kilaeang si Jeffry Iglecias ukon alyas “Pikoy” ag residente it Poblacion, Banga.
Suno sa pagpahayag it suspek, naga pauli eon imaw maghalin sa namatchan kat gulpi eon lang nga gin subeang ag gin dumog it mga operatiba kadunghan it pagposas kana.
Naga pamalibad man raya nga may natabong buy bust.
Nasayuran nga si Pikoy hay sangka drug surrenderee.
Aminado man raya nga dating nagagamit it shabu apang, mabuhay eon sigon nga nag untat.
Sangka sachet man it suspected shabu ro nabo-oe sa operasyon ag owa man it dugang nga narekober sa suspek sa pagpaidaeum kana sa body search.
Owa man sigon it nabo-oe nga buy bust money bangud sa owa eon raya napasa-alima it suspek kasunod it natabo nga pagdueomugan.
Ro nasambitan nga operasyon hay gin pangunahan man it Provincial Drug Enforcement Unit (PDEU).
Sa makaron hay gina pahaum eon ro kasong iga pasaka kontra kay Iglecias bangud sa gina alegar kara nga paghupot it illegal nga droga.
