KALIBO, Aklan—Kasunod it pagtapos it comelec gun ban ko Hunyo 8, kabilugan nga 240 nga indibidwal ro nadakpan nga nag-eabag sa nasambit nga laye sa bilog nga Western Visayas umpisa ko Enero 9.
Raya ro ginpahayag ni P/Lt. Col. Arnel Solis, tagapaghambae it Police Regional Office ukon PRO-6.
Suno kana nga nakakumpiska ro mga otoridad it 138 nga mga firearms ag 115 nga mga deadly weapons.
Ro Negros Occidental suno kana ro may pinaka-maabu nga numero sa mga naarestong violators nga may 80 nga ginsundan it probinsiya it Iloilo nga may 42 ag pangatlo ro Aklan nga may 28.
Ro Antique hay nakalista it 26, ro Capiz hay may 12, Guimaras nga may waeo, Iloilo City hay may 24 ag ro Bacolod City nga may 20.
Sa 28 nga nadakpan sa probinsiya it Aklan, pito ro firearms ag 22 ro deadly weapons.
Gindugang pa ni Solis nga raya tanan hay natigayon eon nga mapasakaan it kaso.
Kaabuan sigon sa mga raya hay nadakpan sa pagresponde it kapulisan nga puro tanan mga sibilyan.
Nasayuran nga kaeabanan sa mga nakumpiska nga armas hay loose firearms ukon owa it nagakaigo nga dokumento.
Kasong illegal possession of firearms ag pag-eabag sa gun ban ro paga atubangon it mga raya.
Sa pihak nga parte, sa pagtapos it election period, ginpahayag ni Solis nga pwede eon bitbiton sa guwa it baeay ro mga lisensiyadong armas ukon may permit to carry outside residence.
