KALIBO, Aklan–Kabilugan nga 29 nga behikulo sa isla it Boracay ro nadakpan it Malay Municipal Transportation Office bangud nga owa it nagakaigo nga permits to transport.
Suno kay senior transportation regulation officer Cesar Oczon Jr. nga ro nasambit nga mga behikulo hay gin-tow ag naka-impound makaron sa mainland Malay bangud sa pag-eabag sa naga-eksister nga ordinansa.
Gin-isyuhan man it citation ticket ro nagapanag-iya nga may multa nga naga-abot sa 2,500 pesos.
Kaparte man sigon raya it ginapatigayon nga road clearing operations it lokal nga gobyerno it malay, kun sa siin sambilog sa ginatutukan hay ro paghimos sa mga illegal nga saeakyan sa isla.
Sa nasambit nga numero, 27 kara ro motorbikes, all-purpose vehicle ag multicab.
Gindugang pa ni Oczon nga may pilang cargo boat ro nagapaeusot it mga saeakyan sa isla nga owa it nagakaigo nga permiso.
Ko 2020 suno kana hay nakalista sanda it 58 nga mga saeakyan nga iligal nga ginpatabok sa isla.
Gamit ro ginbakae nga towing truck , ginahimos makaron ro mga abandonado ag iligal nga nakaparking nga saeakyan isla.
Samtang, gin pahayag ni Oczon nga temporaryo makaron nga ginsuspinde it LGU-Malay ro pag-proseso ag pag-isyu it mga bag-ong permits to transport it mga motorsiklo eabi eon kon para sa personal use agud nga malimitahan ro saeakyan sa isla.
Gin-abisuhan man nana ro mga naga-apply para sa renewal it permit to operate it mga motorsiklo eabi eon it mga empleyado nga permanente nga nagatrabaho sa isla ag ginagamit sa negosyo nga mag-agto eamang sa andang taeatapan para sa pagbo-oe it application form ag iba pang mga kinahangeanon nga dokumento.
Apang ro pwedeng makabo-oe kara sandig sa Municipal Ordinance No. 415, series of 2020 hay ro naga-angkon it “10 years residency ag may comelec registration nga nakaboto it daywang magkasunod nga eleksyon.
