KALIBO, Aklan—Kaeabanan sa mga nagabakasyon sa isla it Boracay sa naunang daywang domingo it Nobyembre hay mga turista halin sa National Capital Region (NCR).
Base sa datos halin sa Malay municipal tourism office nga ro tourist arrivals sa Boracay nga nag-agi sa Caticlan jetty port hay umabot sa 1,611 halin Nobyembre 1 hasta 17.
Sa nasambit nga numero, 1,154 ukon 71.6% it arrivals ro naghalin sa NCR.
Raya hay ginsundan it mga bisita halin sa Aklan nga may 406 nga arrivals ukon 25% it kabilugan.
Madumdum nga ro Boracay hay nagbukas sa mga domestic tourists eakip ro mga taga-metro manila ko Oktubre 1.
Sa makaron hay required gihapon sa mga non-Aklanon nga bakasyunista ro negatibong resulta it RT-PCR test , daywa hasta tatlong adlaw antes ro pagbiyahe.
Ginduaea eon man ro age restrictions.
Antes nga makasueod sa isla, kinahangean man nga may una nga confirmed booking halin sa DOT-accredited accommodation establishment, air tickets ag negative test results nga igasumite online sa aklan.gov.ph.
May kabilugan makaron nga 250 nga accommodation establishments ro gin-isyuhan it certificate of authority to operate it DoT nga pwedeng makabaton it mga bisita.
