KALIBO,AKlan–Nag-umpisa eon nga magtao it kasadyahan sa publiko ro kaean-an sa kalye nga makit-an sa guwa it Kalibo Pastrana Park partikular sa likod it grand stand.
Raya hay bilang kaparte sa nagahilapit nga selebrasyon it kapyestahan ni San Juan de Bautista sa maabot nga adlaw it Sabado, Hunyo 24.
Suno kay Mary Gay Quimpo-Joel, head it Municipal Economic Enterprise Development Office ukon MEEDO Kalibo nga kapin sa 27 ka mga food establishments ro nagpasakop sa kaean-an sa kalye.
Mag-eowas kara, may mga banda nga magatukar hasta alas-12:00 it tungang gabie nga naghalin pa sa syudad it Iloilo ag Metro Manila.
Ginaeauman nana nga magahatak raya it maabong tawo bangud nga siguradong nahidlaw man ro mga pumueoyo sa kasadyahan sa haeos daywang dag-on nga limitado eamang ro naging hueag it tanan bangud sa pandemya.
Magabuhay ro kaean-an sa kalye sa nasambit nga lugar it tatlong gabie ukon hasta sa biyernes it gabie.
