KALIBO, Aklan — Gin-engganyo ni Aklan Governor Florencio Miraflores ro Armed Forces of the Philippines nga siguraduhon ro kaeowasan it mga miyembro it Revolutionary Proletarian Army-Alex Boncayao Brigade (RPA-ABB).
Raya hay kasunod it pakikipagkita it kapin sa 700 nga RPA-ABB members sa bilog nga isla it Panay kay Pangueong Rodrigo Duterte ko nagtaliwan nga domingo sa sueod it kampo it Philippine Army sa Jamindan, Capiz.
Masobra sa 200 sa mga raya hay mga Aklanons.
Suno sa gobernador nga sa makaron hay owa eon it armas ro RPA-ABB agud nga depensahan ro andang mga kaugalingon kasunod it pag- decommissioned kanda it gobyerno .
Nasayuran nga ko 1990s, ro RPA-ABB, nga nagaserbing sparrow unit it NPA hay nagdesisyon nga magseparar sa nasambit nga rebeldeng grupo.
Ko dag-on 2000, ro grupo nga gintawag nga Kapatiran hay nagpirma it kasugtanan it pakikipag-alyansa sa gobyerno.
Umpisa kato hay ginduso ro local peace process sa RPA-ABB, kun sa siin, kaabuan sa mga raya hay mga tumandok it banwa it Ibajay.
Sa makaron ro banwa it Ibajay hay kilaea sa bilog nga nasyon nga may pinaka-moderno ag advance nga peace agreement sa RPA-ABB.
May andang pangabuhian, konkretong daeanon, ag ro nakataeanang ipatindog nga housing unit nga ginpromisa ni President Duterte.
