Kalibo Aklan ——Nagapangatubang sa kasong Concubinage ro sangka Brgy. Kagawad matapos nga ginreklamo it anang kaugalingon nga misis matapos nga maaktuhan sa sueod mismo it andang panimaeay kaibahan ro anang mistress ukon kabit sa banwa it Madalag.
Suno sa 52-anyos nga ginang, haeos daywang dag-on eon nga magkarelasyon ro anang 58-anyos nga mister ag ro 42-anyos kara nga kabit apang uwa sigon imaw it mapatuod hasta ko Mayo 10 it presenteng dag-on hay nakit-an nana ro baye sa sueod mismo it anang panimaeay.
Bangud kara, ana nga ginmanmanan sa sueod it sang dominggo hasta ko Mayo 17 bandang alas-4:30 it aga-aga, kaibahan ro Madalag PNP hay anda nga ginsueod ro baeay ag idto naaktuhan nga nagahulid ro daywa sueod it kwarto.
May kaangtanan kara, insigidang gindaea sa taeatapan it pulisya ro daywa kon sa siin sanda ginpasakaan it kaso it misis.
Ginpahayag dugang it ginang nga may ap-at sanda ka mga onga ni Kagawad samtang ro babaye nga anang kabit hay may asawa ag may ap-at man ka mga onga.
Nauna kara, nagkalabuan ro mag-asawa rason nga magkaseparado ro baeay nga andang ginaistaran.
Samtang, kapin sa 30,000 pesos ro gintaeana it korte nga pyansa kay mister samtang ro sa anang kabit hay 3,000 pesos para sa andang temporaryong kahilwayan.
