KALIBO, Aklan—Kahadlok it Pangueong Rodrigo Duterte nga mangin madinaeag-on ro kampanya ni Vice President Leni Robredo kontra sa illegal nga droga ro sambilog sa ginatan-aw nga rason it kaalyado kon ham-an it ginsibak raya sa pwesto bilang co-chairperson it Inter-Agency Committee on Anti-Illegal Drugs (ICAD).
Suno kay Congressman Erin Tañada, vice president it Liberal Party, napas-eawan eun it una ro administrasyon rason nga ginsaylo sa bise presidente ro anang katungdanan.
Apang bangud sa determinasyon ni Robredo, nagduha-duha si Pangueong Duterte nga mangin madinaeag-on ro anang tikang rason nga ginsibak raya sa pwesto.
Ginpahayag dugang nga bukon it seryoso ro presidente sa anang pag-appoint bangud sa pahayag nga owa raya it salig sa bise presidente apang imaw man ro nagdesisyon nga papungkuon sa pwesto si Robredo.
Madumduman nga tatlong dominggo pa eamang halin kat ginbutang sa pwesto it 74-anyos nga chief executive ro 54-anyos nga bise presidente sa pagiging ICAD co-chairman.
Nasayuran nga ko adlaw it Sabado, Nobyembre 23, hay nagpangayo pa it pasaylo si Pangueong Duterte kay Robredo bangud sa nabo-eo kara nga “fake news” kaangot sigon sa pakipagpueong it bise presidente sa UN Commission on Human Rights.
