KALIBO, Aklan—Ginapadahan it kapulisan ro mga nagabaligya ag kahera kontra sa modus nga “palit-pera”.
Raya hay matapos nga sangka miyembro it LGBT ro naispatan nga nagapang-biktima gamit ro nasambit nga modus sa probinsiya it Aklan.
Sa pilang mga CCTV footage, makita ro gina-obra nga palit pera modus it suspek nga ginasugid nga tagalog speaking kun sa siin madasig kara nga napataeang ro kahera it pilang establisimento.
Ro video footage ag litrato it nasambit nga LGBT member hay nag-trending eon sa social media nga humakot it mga negatibong reaksyon halin sa mga netizens.
Samtang, ginpahayag ni P/Major Willian Aguirre, head it intelligence unit it Aklan Police Provincial Office ukon APPO nga pila sa mga biktima hay nagpa-blotter sa andang natungdan nga police station partikular sa Kalibo, Altavas, Nabas ag Ibajay.
Sa andang pag-imbestiga, nakikipag-transaksyon ro suspek sa sangka establisimento ag pagkatapos nga magbakae it pilang items hay nagabayad it P1,000 bill.
Madasig kara nga ginasueod sa anang bag ro ginsinsilyo ag pagkatapos hay magareklamo nga kueang ro gintau kana ukon ginatawag nga ‘short changing scheme’.
Angot kara, gin alerto eon man sigon nanda ro andang mga kaiping nga probinsiya kontra sa suspek kaibahan ro anang kasabwat nga driver it get-away vehicle nga sangka motorsiklo.
Padayun man nanda nga ginatukib ro pagkatawo ag kon taga siin ro mga raya.
Apang mabahoe ro andang pagpati nga bukon it akeanon ro suspek kundi nga halin raya sa kaiping nga probinsiya it Iloilo, Bacolod ukon Roxas City.
Angot kara, laygay ni major Aguirre sa mga establisimento nga mag-install it CCTV camera kamana man nga indi eagi magpati nga nagkasaea sa pagsinsilyo ag kon naga-demand ukon naga-reklamo hay i-hold anay ro customer it makadali.
