KALIBO, Aklan—Nagpaabot it pilang sentimiyento ro mga DayCare Worker sa ginpatigayun nga session it Sangguniang Bayan it Kalibo, kahapon adlaw it Lunes.
Raya hay matapos nga magtambong sa session ro pilang representante para magpabuoe it litrato nga pagagamiton sa andang accreditation.
Apang, may pilang miyembro it konseho nga nag-usisa sa kahimtangan it mga manugturo.
Kung siin, ginsaysay man it mga DayCare worker ro andang sakripisyo ag pagkinahang-ean para eamang makatao it serbisyo sa mga unga.
Aminado man ro mga raya nga ginakueang ro kaabuan kanda eabi eon pag-abot sa pag-comply it medical certificate, X-ray ag iba pa bangud maisot eamang ro andang ginabaton nga honorarium.
May mga kahigayunan man sigon nga ro ibang materyales para sa ekswelahan hay maghalin pa sa andang kaugalingon nga buesa.
Rason nga hugut ro andang pag-apela sa mga natungdan nga mabuligan ro andang sektor agud nga makasunod man sanda sa nagatinaas nga presyo it mga nagapangunang kinahang-eanon ag serbisyo.
