Gin-aku it Pinoy basketball player nga si Kai Sotto nga gusto nana nga maghimo it kasaysayan engkaso nga mapili sa pagahiwaton nga 2022 NBA Draft.
Suno sa 7 foot, 2 inches center, maabu nga mga kababayan nana sa Pilipinas ro nagahandom nga makaangkon it full blooded Filipino nga nagahampang sa NBA.
Kung madumduman tatlong mga Filipino-American players eon ro nakahampang sa NBA apang pinasahi si Sotto nga sangka full blooded nga Pinoy.
Ko dag-on 1978 ro kauna-unahang Fil-Am nga naghampang sa NBA hay si Raymond Townsend sa idaeom it Golden State Warriors.
Makataliwan ro tatlong dekada sunod nga nakasueod sa NBA hay ro Fil-Am guard nga si Jordan Clarkson ag ko nagtaliwan nga dag-on hay maswerteng napaeakip si Jalen Green sa idaeom it Houston Rockets.
