Nagapameligro nga pagakueangon ro supply it raw sugar sa nasyon.
Raya ro ginpaandam it Sugar Regulatory Administration (SRA) matapos nga mapilitan eon ro mga manufacturer nga magbo-oe it local supply nga limitado eamang sa merkado.
Suno kay SRA Administrator Hermenegildo Serafica, ro mga manufacturer nga dati eon nga owa nagabakae hay nagabakae eon makaron it raw sugar agud nga iproseso bilang refined sugar para sa andang consumption.
Ginabasoe man ni Serafica sa United Sugar Producers Federation sa pagpanguna it andang presidente nga si Manuel Lamata ro pagtaas it presyo it asukar sa nagtaliwan nga mga binuean bangud sa pagbaeabag it grupo sa importasyon it refined sugar.
Sa datos it SRA, kapin sa P49 pesos hasta P71 pesos eon ro kada kilo it retail price it raw sugar sa mga supermarket makaron nga buean halin sa dating P41 pesos hasta P56 pesos sa kaparehong tiempo makaron nga dag-on.
Kapin sa P58 pesos hasta P70 pesos man ro presyo kara sa mga tindahan kumpara sa P43 hasta P48 kada kilo ko nagtaliwan nga dag-on.
