Ginkalipay ni re-elected Vice Governor Atty. Reynaldo Quimpo kaibahan sanday dating Governor Florencio Miraflores ag mga dati ag re-elected nga miyembro it Sangguniang Panlalawigan ro pag-abswelto kanda it Office of the Ombudsman sa ginpasaka nga kasong Anti-Graft and Corrup Practices Act ag Code of Conduct and Ethical Standards for Public Officials and Employees ukon pag-eabag sa Republic Act No. 7160 ukon Local Government Code of 1991.
Suno kay Vice Governor Quimpo nga napamatud-an nga bangud sa kakueangan it probable cause ag nagakaigo nga ebidensiya rason nga nabasura ro kaso.
Gindugang pa kara nga nga owa it natabu nga irregularidad ukon illegal nga hilimuon ro mga gindemanda nga opisyal partikular ro gina-alegar nga pagdugang it kantidad nga gin-utang it dating gobernador sa Development Bank of the Philippines ukon DBP nga gin-aprubahan it provincial board.
Base suno kana sa mga resolusyon ag deliberasyon it SP ko 2018, ro gin-aprubahan eamang nga kantidad hay P153 milyon pesos nga gintaeana para sa mga nagkaeain-eain nga infrastructure projects.
Ginpaathag pa it opisyal nga ro ginatumod nga P1.053 billion pesos hay total credit facility nga ginkasugtan it DBP ag provincial government it Aklan.
Hasta makaron hay available pa sigon ro nasambit nga credit line, apang kon maga-loan it uman hay nagakinahangean it pag-apruba it sanguniang panlalawigan.
Madumduman nga ro kaso hay ginpasaka it mga complainant nga sanday Ignacio Yulo Dumalaog ag Victor Garcia sa alegasyon nga nag-kuntsabahan ro mga akusado sa pagpataas it kantidad nga iga-loan.
Nasayuran nga nauna eon nga nagpasaka it kaparehong kaso ro nasambit nga mga complainant sa regional trial court ukon RTC antes ro 2019 eleksyon, apang nadismiss man ro kaso .
