KALIBO, Aklan—Nagpatigayon it komprehensibong legislative inquiry ro Sangguniang Panlalawigan it Aklan angot sa masami nga pagkapaeong it supply it kuryente nga naeksperyensyahan sa nagkaeain-eain nga lugar sa probinsya.
Ginpangunahan raya it Committee on Energy ag Committee on Laws, Rules and Ordinances bilang kaparte it tikang it konseho nga protektahan ro kapakanan it mga consumer ag matumod ro mga rason it pauman-uman nga power interruptions.
Nagtambong sa pagpamati ro mga representante it Aklan Electric Cooperative, Inc. (AKELCO) ag National Grid Corporation of the Philippines (NGCP).
Nagpasakop man online ro mga representante it Department of Energy (DOE) agud magtao it impormasyon ag pagklaro angot sa sitwasyon it suplay it kuryente sa Aklan.
Angot kara, ginpahayag ni Aklan Provincial Board Member Apolinar Cleope, naklaruhan sa plenaryo nga kueang nga mayad ro supply it kuryente sa Visayas grid matapos nga ro pinakamabahoe nga planta hay nag-down rason it schedule manual dropping nga ginahimo it Akelco nga nagaresulta sa rotational black-out.
Nasayuran dugang sa pagpamati nga nagabakae si Akelco it power supply sa spot market agud nga masustine ro kuryente rason nga nagtaas man ro baeayran it kada konsumidor.
Bukon eamang it sa Wholesale Electricity Spot Market nagahalin ro power supply it Akelco bangud nga may una sigon sanda nga Power Supply Agreement (PSA) ukon kontrata sa mga power generator.
Sa makaron suno kay Cleope, ro band-aid solution it DOE hay mabutang sanda it power barge agud nga mabuhinan ro mga rotational black-out.
Apang, ginpaabot it mga opisyal nga kinahang-ean ro long term solution para mapamayad ro andang serbisyo sa mga konsumidor.
