KALIBO, Aklan—Dapat nga maging mapagbantay ro mga gina-deploy nga Kalibo Auxiliary Police ukon KAP members sa mga national highways agud nga indi maeusutan it mga traffic violators.
Raya ro ginpaathag ni Ex-officio member it Sangguniang Bayan ag Pook Punong barangay Ronald Marte angot sa resolusyon nga anang gindihon sa konseho kun sa siin ginpukaw kara ro atensyon it taeatapan ni Kalibo mayor Emerson Lachica pinaagi sa Traffic and Transport Management Division ukon TTMD.
Nataeupangdan sigon kara nga maabu nga mga KAP members ro owa masyadong nakatutuk sa andang trabaho eabi eon ro mga naka-assign sa kanto it Roxas Avenue ag Mabini St., kanto it Osmenia Avenue pati man sa Jaime Cardinal Sin ag Mabini St. kanto it D. Maagma street.
Kaibahan suno kana sa mga traffic violations nga anang pirmeng naispatan partikular it mga tricycle drivers hay ro disregarding signal devices and traffic lights kamana ro swerving ukon gulping pag-U-turn.
Gindugang pa ni Marte nga hugtan ro implementasyon it batas trapiko ag isyuhan it violation ticket ro mga maga-eabag kara.
Sa pihak nga parte, nagapati si Marte nga bukon it problema ro kakueangan it manpower it mga KAP members kundi ro importante hay ma-estudyuhan ro tamang deployment ag bukon it ignorante sa traffic rules and regulations.
