KALIBO, Aklan – Katuyuan it Kalibo Campus Journalism Ordinance nga taw-an it haega ro mga campus journalist sa banwa it Kalibo eakip ro paghubog sa mga talento ag kapasidad it kada inunga.
Pahayag ni Sangguniang Bayan Member Philip Yerro Kimpo, awtor it ordinansa nga raya hay daean man para masuportahan ro mga inunga nga Kalibonhon sa pagrepresenta it Aklan sa mga Regional ag National Schools Press Conference.
Paathag man nana nga sa anang pagkasayod hay Kalibo eamang ro unang Local Government Unit nga may lokal nga ordinansa pag-abot sa nasambit nga topiko.
Suno pa sa konsehal nga unang ginhiwat ro Kalibo Schools Press Conference it Kalibo II sa Kalibo Integrated Special Education Center kun siin gin-adtunan raya it haoes 600 nga mga partisipante.
Makabig sigon nana nga overwhelming ro pagbaton sa aktibidad.
Nagapati si SB Kimpo nga raya nga ordinansa hay daean para nga mataw-an it pagkilaea ag haega ro mga Kalibonhon journalists kapareho it pagtao man it dungog sa mga atleta.
Pagpasiguro pa nana nga ro LGU Kalibo hay suportado ro mga campus journalists.
Samtang, hiwaton man ro masunod nga Kalibo Schools Press Conference it Kalibo I sa paeaabuton nga Oktubre 23.
