KALIBO, Aklan—Pormal eon nga ginbuksan ro substation it Bureau of Fire Protection (BFP)-Kalibo sa bahin it Brgy. Estancia makaron nga adlaw it Martes, Setyembre 27.
Ro nagapanguna nga bisita sa okasyon hay ro mismong Regional Director it BFP-6 nga si Chief Superintendent Jerry Candido.
Nagtambong man sa inagurasyon si Kalibo Mayor Juris Sucro, Vice Mayor Cynthia Dela Cruz, daywang ka mga Sangguniang Bayan member ag ro pilang BFP personnel halin sa nagkaeain-eain nga banwa it Aklan.
Sa naging mensahe ni Chief Superintendent Candido, ginpasaeamatan kara ro lokal nga gobyerno sa pagpasugot sa BFP-Kalibo nga magtukod it substation sa Brgy. Estancia.
Ginpahayag pa kara nga kaparte raya it andang programa agud nga mapaeapad ag mapaeapit sa mga pumueoyo ro andang serbisyo.
Tuyo man kara nga madasig nga maka-responde ro mga bumbero sa oras it emerhensiya.
Sa pihak nga parte, gindayaw man it opisyal ro mga BFP personnel halin sa pilang ka mga fire station it probinsya matapos nga na-promote sa andang trabaho.
