KALIBO, Aklan—Matapos ro tatlong adlaw nga pagpasarado, balik eon sa normal ro operasyon it Kalibo International Airport.
Suno kay Engr. Eusebio Monserate Jr., Manager it Civil Aviation Authority of the Philippines ukon CAAP-Aklan nga umpisa ko Enero 22 hay uman nga nakabiyahe ro tanan nga commercial passenger flights pasueod ag paguwa it paeuparan kun sa siin kaabuan sa mga pasahero hay Locally Stranded Individuals ukon LSIs, APOR ag Returing Overseas Filipinos ukon ROFs.
Nasayuran nga ginpaidaeum sa lockdown ro paeuparan ko Enero 19 hasta 21 agud nga taw-an it daean ro disinfection matapos nga magpositibo sa covid-19 ro pila sa andang mga empleyado.
Owa man suno kana it mga pasahero nga naapektuhan bangud nga antes ro lockdown hay nagpaguwa sanda it Notice to Airmen ukon NOTAM sa tanan nga commercial ag passenger flights.
Samtang naka-lockdown suno kana hay bukon eamang ro mga flights ro suspendido kundi maskin ro mga empleyado, stakeholders ag mga kliyente hay bawae nga makasueod sa paeuparan.
Maskin suno kana ro andang control tower building hay ginpa-disinfect man.
Gindugang pa ni Engr. Monserate nga ro andang mga empleyado nga naka-work from home hay nakabalik eon sa trabaho.
Sa pihak nga parte, daywa eon lang sa mga personnel it airport nga nagpositibo sa covid ro naka-facility quarantine samtang ro iba hay naka-uli eon sa andang natungdan nga mga baeay samtang ro iba hay nakabalik eon sa trabaho.
Madumduman nga umabot sa 25 ro mga empleyado nga nakaangkon it deadly virus umpisa nga tumama ro pandemya.
Agud nga indi eon maeusutan it mga covid positive, nagbilog it task group si engr monserate nga hugut nga maga monitor sa pagpatuman it safety and health protocols pinaagi sa tagline nga “maki-alam covid ay labanan”.
Ro andang scheduled flights suno kana hay Lunes, Miyerkules, ag Huwebes kamana man nga may tatlong flights kada domingo nga adlaw nga aprubado it Inter-Agency Task Force.
