KALIBO, Aklan–Kasunod it amat-amat nga pagbangon it Kalibo International Airport halin sa epekto it pandemya, naga-average eon makaron it pitong flights kada adlaw ro mga airline companies nga may rotang Kalibo-Manila.
Suno kay Engr. Eusebio Monserate, Jr., Manager it Civil Aviation Authority of the Philippines ukon CAAP-Aklan nga ginaeauman pa nanda ro pag dugang it mga flights tuga it mataas nga numero it mga pasahero.
Haeos punuan eon man sigon ukon fully occupied ro mga eroplano nga naga-aeabutan.
Bangud kara, gin-extend nanda ro andang operasyon nga halin sa dating alas-6 it agahon hasta alas-6 it gabi-e hay gin-obra eon raya nga hasta it alas-10 it gabi-e kun sa siin haum eon man ro paeuparan sa night flight operations.
Sa pihak nga parte, gindugang pa ni Engr. Monserate nga may mga proposed international flights schedules eon sanda nga nabaton , apang nagka-aberya matapos nga makaangkon it entry requirements ro mga turista halin sa China, Korea ag Taiwan kamana man ro quarantine regulations sa andang point of origin ukon pag-uli sa andang natungdan nga nasyon.
