KALIBO, Aklan–Ginaeauman makarun it Kalibo International Airport ro pagnaba it mga pasahero nga nagaguwa ag nagasueod sa paeuparan.
Apang sa pihak kara, ginklaro man ni Civil Avaition Authority of the Philippines ukon CAAP-Aklan Manager Engr. Eusebio Monserate Jr. nga owa pa it ginpaguwa nga advisory ro mga airline companies kung raya hay magabuhin it andang mga flights.
Sa makarun suno pa kana hay owa pa it derikta nga epekto ro pagbawae anay sa pagbatun it mga naga-uli nga non-essential travelers maghalin sa NCR plus bubble.
Samtang ginpahayag man ni Engr.Monserate nga ro tanan nga ginapatuman it andang taeatapan hay sandig eamang sa Executive Order nga ginapaguwa ag ginapermahan ni Aklan Governor Florencio Miraflores.
Angot kara, ana man nga ginpabugae nga nakaplastar it maayos ro mga requirements it mga naga-uli sa probinsya.
Bangud kara, napadali ro pagproseso it mga travelers it andang mga kinahangeanon agud nga makauli sa andang tagsa-tagsa ka mga lugar.
