KALIBO, Aklan—Mabahoe eon ro naluging kita it Kalibo International Airport bangud sa haeos daywang buean nga anti-coronavirus lockdown.
Suno kay Civil Aviation Authority of the Philippines ukon CAAP-Aklan manager Engr. Eusebio Monserate, Jr. nga bangud nga bawae ro air travel ko tiempo it lockdown rason nga owa man sanda it kita, kun sa siin, ro andang revenue hay nakadepende sa air navigation fees, landing and take-off fees, parking fees, mga concessionaires sa paeuparan ag iba pa.
Sa makaron nga amat amat eon nga nagabalik ro domestic flights hay may nagasueod eon suno kana nga kita ro CAAP.
Nauna eon nga ginatantiya it andang taeatapan nga posibleng abuton pa hasta sa 2nd quarter it 2021 antes nga makabangon ro mga paeuparan sa nasyon.
Sa pihak nga parte, may kamaeayran man sigon nga hatud ro lockdown bangud nga napadasig kara ro rehabilitasyon it andang parking bay nga ginaeauman nga matapos sa katung-anan it Agosto nga makabaton it mas maabu pa nga mga eroplano sa oras nga magbalik eon ro andang normal operation.
Bangud sa nagapadayun nga construction suno kana it runway sa kalibo airport hay tatlo eamang sa pitong parking bay ro ginagamit.
Raya hay kaparte sigon it 721 million pesos nga proyekto.
Dugang nga 10 pa nga parking bay ro target nga mapa-obra sa may parte it nalook area nga ginaeauman nga matapos sa katapusan it dag-on.
Apang pending suno kana ro andang runway expansion bangud nga owa pa nakompleto ro acquisition it eugta sa palibot it paeuparan.
