KALIBO, Aklan—Bukon it pabor si Mayor Emerson Lachica nga magpatuman it “No movement Sunday” sa banwa it kalibo, ro ginakabig nga capital town it probinsiya.
Suno sa ama it banwa bukon imaw it kumbinsido nga ro pagpatuman it nasambitan nga pagsinueondan ro makabulig pa sa publiko makarun nga tiyempo it krisis tuga sa gihapon it coronavirus disease ukon COVID-19 pandemic.
Dugang pa it alkalde nga makarun hay pasakit eun sa mga una sa business sector ro pagpatuman it limitasyon sa andang operasyon nga naga-umpisa eamang it alas 6:00 sa agahon hasta alas 4:00 sa hapon.
Mas dugang pa sigon nga “aray” para sa mga negosyante ro pagkaangkon it sang adlaw nga day off sa sueod it sang dominggo.
Pagklaro pa kara nga dapat hay ibalanse ro ekonomiya ag ro ikaayong eawas.
Samtang nag-apela man si Mayor Lachica sa iba pang mga munisipalidad nga kungta hay mas pang striktuhan it mga raya ro andang municipal border bangud haeos maabo sa gihapon ro nakaka-eusot.
Madumduman nga nagpasa it sangka resolution ro Chairman it Committee on Health nga si Kalibo Sangguniang Bayan member Ketchie Luces agud nga himuon nga “rest day” ro adlaw it dominggo.
Samtang sa pihak nga parte ginklaro man ni Kalibo Vice Mayor Cynthia Dela Cruz nga aprubado eun sa ginpatigayon nga session it Sangguniang Bayan ro nasambitan nga proposisyon.
Apang raya hay magasaka pa sa gihapon sa opisina ni Kalibo Mayor Emerson Lachica.
Nakadepende man sigon sa alkade kung raya hay anang paga-aprubahan ukon hueaton anay ro magiging resulta it pagpueong kaibahan ro Municipal Inter-agency task force ukon MIATF.
Pag-depensa pa it bise alkalde nga kunta hay estudyuhan ni Lachica bukon eamang it mga negosyante kungdi pati man ro para sa kaeuwasan it mga pomoeuyo.
