Nagpatawag it emergency meeting si mayor Juris Sucro sa mga kapitan it kabarangayan nga sakop it banwa it Kalibo.
Suno kay Poblacion punong barangay Neil Candelario, gin-istoryahan sa andang hinun-anon kaibahan ro pamunuan it municipal agriculture office ag Kalibo PNP angot sa mga precautionary measure nga pwedeng himuon agud nga inde masudlan it African Swine Fever ukon ASF virus ro capital town it probinsya it Aklan.
Angot kara, magapaguwa it executive order si mayor Sucro agud nga maipatuman ro border control checkpoint nga iga-establisar sa barangay Tigayon, Caano, Mobo ag sa may bahin it Kalibo-Numancia bridge.
Ginpahayag dugang nga ro force multipliers hay magabantay 24/7 sa nasambit nga mga borders kon sa siin strikto ag maid-id nanda nga pagasikyaron ro mga live weight nga baboy nga magasueod sa Kalibo partikular ro mga magapakatay sa slaughter house.
Angot kara, pagausuyan ro mismong tag-iya it pila ka mga dokumento kaparehas it barangay clearance ag permit maghalin sa slaughter house.
Mag-eowas kara, hugot man nanda nga pagausisaon ro tanan nga frozen ag processed pork products nga maideliver iya sa banwa.
Sa raya nga pamaagi sigon hay malikawan nga masudlan it ginakabaeak-an nga virus ro Kalibo nga sentro it komersyo.
