KALIBO, Aklan–Bukon it pabor si Kalibo Mayor Emerson Lachica sa proposisyon nga ipasarado ro munisipyo sa sueod it ap-at hasta limang adlaw agud nga ipaidaeum sa maid-id nga disinfection.
Suno kana nga kaabuan sa mga transaksyon makaron hay importante bangud nga essential travel eamang ro ginapasugtan rason nga kinahang-ean nga may maaywan nga empleyado sa kada departamento it munisipyo.
Nauna eon nga ginduso ni Sangguniang Bayan Member Augosto Tolentino ro temporaryong pagpasarado it munisipyo bangud sa maka-alarma nga pagtinaas it kaso it mga empleyado nga tinamaan it deadly virus.
Ro ginapatuman sigon nanda makaron hay ro skeleton workforce ag work-from-home.
Samtang, sigidas man sigon ro disinfection makaron sa mga nagapangunang karsadahon sa banwa it Kalibo sa bulig it Bureau of Fire Protection.
