KALIBO, Aklan—Ginkumpirma ni Kalibo Mayor Emerson Lachica nga uwa it contact tracing nga natabo kasunod it pagpositibo it 48 anyos nga seafarer sa Covid-19.
Suno kana, uwa sigon nakapanaw ro nasambit nga overseas filipino worker halin kat ginrefer imaw sa strict home quarantine nga eubus man sigon nandang ginapasaeamatan.
Ginpahayag dugang ni Mayor Lachica nga activated ro tanan nga barangay health emergency response team kon sa siin haom sanda sa mga paaeabuton pang mga repatriated ofw’s ag mga locally stranded individual ukon LSI.
Gin-ako man ni Mayor Lachica nga punuan eon ro mga gintaeana nandang quarantine facility kon sa siin ro county inn eon lang ro andang gina-utilize makaron bangud nga ginapanag-iyahan raya it lokal nga gobyerno it kalibo nga ginadumaeahan man it municipal tourism office.
Ro protocol sigon it Department of Health hay pwede nga ipaidaeom eon lang sa strict home quarantine ro mga ofw’s nga maga-uli sa natungdan nga probinsya kon may ginapakita nga negatibong resulta it RT-PCR test halin sa Metro Manila.
Apang, kinahang-ean nga boe-an it uman it swab specimen for repeat testing ag engkaso nga magpositibo hay gilayon nga iga-admit sa Aklan provincial hospital para sa hugot nga monitoring.
Nasayuran nga ro nasambit nga ika-pueo nga kaso it Covid-19 sa Aklan hay nauna eon nga nagnegatibo sa RT-PCR test ag nagapabilin nga istable ro kondisyon kamana man uwa it sintomas it makamaeatay nga sakit.
