KALIBO, Aklan—Ginpabugae ni Kalibo Mayor Emerson Lachica nga sanda ro nagapanguna sa may pinakamataas nga numero it nabakunahan kontra covid 19 halin sa 17 nga kabanwahunan sa bilog nga probinsiya it Aklan.
Suno kana nga naga-abot sa masobra sa 50 porsiyento eon it target nga mabakunahan ro naturukan it first dose samtang ro iba hay fully vaccinated eon.
Matapos suno kana nga ginbuksan nanda ro andang walk-in vaccination hay mas pang nagtaas ro mga gustong magpabakuna kun sa siin indikasyon sigon raya nga nagtaas eon ro acceptance it publiko sa bakuna kontra Covid-19.
Ginpahayag pa ni Mayor Lachica nga maabu man ro nagapila sa pediatric population nga naga-edad it 15 hasta 17 anyos.
Makaron hay nagabaton eon sanda it mga gustong magpabakuna sa mga naga-edad it 12 hasta 17 anyos.
Bangud kara, naga doble sigon ro andang pagtinguha sa pagpanguna it municipal health office agud nga maabot ro herd immunity ukon 70% it target population sa pagtapos it makaron nga dag-on.
Ro mga nagatrabaho ag naga-eskwela sa kalibo maskin nga taga-ibang banwa hay ginabaton nanda sa andang mga vaccination sites sa covered court it Kalibo Pastrana Park ag covered gym it St. Gabriel College sa Old Buswang, Kalibo.
Nauna eon nga nagpaandam ro DILG nga pagapadaehan it show cause order ro mga LGUs nga may manaba nga vaccination rate.
