KALIBO, Aklan–Gin-anunsyo ni Kalibo mayor Emerson Lachica nga gintaw-an eon imaw it gahum it sangguniang bayan nga magsueod sa kasugtanan sa national government kaibahan ro pharmaceutical company nga AstraZeneca para makabakae it bakuna kontra sa COVID-19.
Nauna kara, aprubado man it konseho ro pagtaeana it LGU-Kalibo it P50 milyon pesos nga pondo para sa pagbakae it nasambit nga bakuna.
Gusto it alkalde nga mataw-an it bakuna ro kapin sa 84,000 nga populasyon rason nga posibleng madugangan pa ro nasambit nga pondo.
Napili sigon nanda ro Astrazeneca bangud nga mag-eowas nga barato hay owa nagakinahangean it masyadong maeamig nga storage facility.
Ginklaru pa nana nga ro nasambit nga kantidad hay para sa 1st phase pa eamang it pagbakae it bakuna.
Pagataw-an it prayoridad nga mabakunahan ro mga frontliners, senior citizens ag vulnerable groups eabi eon ro mga naga-istar sa mga congested areas kapareho it C. Laserna St.
Samtang, gindugang pa ni mayor Lachica nga nakataeana imaw nga magapaguwan it executive order sa pagbilog it working committee para sa pagproseso it pagbakae it bakuna, kun sa siin plano kunta nanda nga ibutang bilang vaccine czar si municipal treasurer Rey Villaruel.
Samtang, ginkalipay man ni mayor Lachica nga nagnaba eon sa 21 ro kabilugan nga numero it mga kumpirmadong kaso it COVID-19 sa Kalibo.
