KALIBO, Aklan—Ginkumpirma ni Kalibo mayor Emerson Lachica nga nakabaton eon imaw it bakuna kontra COVID-19.
Suno kana nga naghingabot imaw ko lunes it hapon sa ABL sports and cultural complex kun sa siin ko agahon it kaparehong adlaw hay nauna eon nga naturukan si Governor Florencio Miraflores ag 10 nga iba pang alkalde it Aklan.
Nasayuran nga puro bakunang himo it Chinese company nga Sinovac ro gingamit sa nasambit nga mga opisyal nga naeakip sa A1 group.
Ginpahayag ni mayor Lachica nga matapos ro pagbakuna hay sangkiri nga nagtaas ro anang blood pressure , apang pagkatapos kara hay owa man imaw it nabatyagan nga iba pang adverse effect it bakuna.
Samtang, nagpadayun makaron nga adlaw it Huwebes ro COVID-19 mass vaccination sa banwa it Kalibo para sa mga A1 groups ukon mga frontliners sa covered court it Kalibo pastrana park.
Ginpahayag ni mayor Lachica nga naga-abot eon sa kapin sa 300 ro andang mga nabakunahan sa A1 groups.
Gindugang pa kara nga sa adlaw it Biyernes hay maga-arangkada eon ro pagbakuna sa mga senior citizerns nga kaeakip sa A2 nga mga indigents ag comorbidities kun sa siin target kara ro 100 nga mga recepients.
Kaibahan sigon ro Kalibo sa priority lists nga mataw-an it unang supply it astrazeneca vaccines sa Pilipinas.
Nasayuran nga nag-umpisa man ro pagbakuna it provincial government sa mga A2 groups.
Kaibahan sa naturukan it bakuna si Vice Governor Reynaldo “Boy” Quimpo ag iba pang senior citizens nga miyembro it sangguniang panlalawigan ag iba pang empleyado it provincial government.
