KALIBO, Aklan—Pagahueaton ni Kalibo mayor Emerson Lachica ro magiging sabat ni Dr. Macarius Dela Cruz, Municipal Health Officer it banwa it Kalibo sa memorandum nga ginpaguwa kara ko Oktubre 5, 2020 antes nga makahimo it pinal nga desisyon.
Suno kay Mayor Lachica nga ro anang aksyon hay sandig sa sueundanan it Civil Service Commission (CSC).
Gintaw-an pa sigon nana it 15 diyas si Dr. dela Cruz agud nga maka-report sa trabaho.
Sa oras nga mag-eampas eon ro palugit hay igatugyan eon nanda sa CSC ro maging kapalaran kara.
Ko nagtaliwan nga Agosto 25 hay nagka-istorya sanda ni Dr. dela Cruz, apang makaron hay owa eon imaw nakasayod sa anang ginakahimtangan.
Nauna kara, ginrekomenda it human resource department nga aksyunan ni Mayor Lachica ro reklamo nga ginapangatubang ni dela Cruz sa pag-apruba kara sa maeawig nga leave it opisyal nga nakaangkon pa it extension matapos nga maabutan it lockdown tuga it covid 19 pandemic.
Nasayuran nga ko buean pa it Nobyembre nagdihon it leave of absence si Dr. Dela Cruz, kun sa siin humirit pa it extension nga tatlong buean umpisa Enero 3 hasta Marso 6 it makaron nga dag-on agud nga taw-an it daean ro pagbueong sa anang igbata sa Canada.
Apang hasta makaron hay owa pa raya nakabalik sa trabaho ag sigidas man ro anang pagbaton it sweldo.
May rekomendasyon kara ro HR department nga paeson eon imaw sa trabaho matapos nga kabigon nga AWOL ukon absent without official leave.
Gindugang pa ni Mayor Lachica nga owa man naapektuhan ro operasyon it andang municipal health office sa tunga it pandemya nga ginapangatubang bangud nga maayos man kara ro pagdumaea ni Dr. Jocelyn Garcia.
