KALIBO, Aklan — Naga-eaum si Kalibo Mayor Juris Sucro nga pinaagi sa pagsurender it ginaturo nga lider it Benta slot investment scam hay mataw-an it hustisya ro mga naging biktima kara sa Aklan.
Suno kay Carla Doromal Suñer, executive assistant to the mayor nga matapos nga masayuran nga maabu nga mga Aklanon ro nabiktima it scam hay eubus ro pagkadismaya it alkalde rason nga naghimo imaw it anang kaugalingon nga pamaagi agud nga mabuligan ro mga nabudol it suspek nga si alyas Joy nga kaabuan hay mga maintok nga negosyante ag mga OFWs.
Nauna eon nga ginpahayag it suspek nga bangud sa mga paeag sa anang kabuhi rason nga nagpangayo imaw it bulig sa alkalde nga mataw-an it seguridad ro anang pagsurender sa mga awtoridad, hapon it Martes, Mayo 20, 2025.
Si alyas Joy hay nauna eon nga ginreklamo sa Kalibo Municipal Police Station it kapin sa 40 nga mga indibidwal kat owa mataw-an it pay-out sa andang gin-invest nga kwarta.
Ginasugid nga pila sa mga biktima hay nag-invest it kapin sa P100,000.
Ginaboeobanta nga masobra sa P4 million ro nakulembat it suspek halin sa mga biktima.
Dugang pa ni Suñer nga pinaagi sa koordinasyon ni Mayor Sucro sa Kalibo MPS hay eowas nga nasueang ro suspek sa Caticlan paagto sa Kalibo.
Maskin nga eubus ro paghinoesoe ni alyas Joy sa anang ginhimo nga pagpangloko, apang nagpanindugan ro alkalde nga kinahangean kara nga atubangon ro kasae-anan nga anang ginhimo.
Padumdum sigon ni Mayor Sucro nga pirmeng maging madahan sa mga nakaka-transaksyon eabi eon kon bukon it personal nga kakilaea ag nagatanyag it mga “too-good-to-be-true” nga mga promisa angot sa gin-invest nga kwarta.
