KALIBO, Aklan—Solomenteng si Kalibo Mayor Juris Sucro ro napilian sa bilog nga Pilipinas nga nagbaton it award sa gin patigayon nga Thailand International Leadership Award 2023 sa Bangkok.
Suno kay Carla Doromal Suñer, Executive Assistant II to the Mayor nga may mga hurado para sa nasambit nga pasidungog ag nagpangibabaw si Mayor Sucro sa Asia’s Most Remarkable Transformational and Visionary Leader Award bukon eamang sa bilog nga Visayas kundi sa bilog nga nasyon.
Dugang pa nga sa bilog nga asya hay imaw ro gintaw-an it award para sa nasambit nga kategorya.
Ginpahayag pa ni Suñer nga posibleng bangud sa mga ginduso nga transformation ag vision ni mayor Sucro rason nga nabaton nana ro nasambit nga award.
Nasaksihan man sigon it mga pumueuyu nga maskin nga haeos daywang dag-on pa eamang sa pwesto ro alkalde hay maabu eon raya nga hinimuan para sa ika-umwad it banwa ag kamaeayran it mga pumueuyu.
Ginahaead it alkalde ro anang gin-uli award sa mga kalibonhon kadungan ro pagpasiguro nga magahimo pa it mga programa ag proyekto para sa kamaeayran it tanan.
Mag-eowas kara, ro LGU Kalibo hay nag-top 9 bilang Most Competitive Municipality sa bilog nga nasyon sa 1st and 2nd class municipalities.
Sa bilog nga visayas region, ro banwa it Kalibo eamang ro nakasueod sa top 10.
Samtang, no comment man si Suñer sa mga nagakalhit nga impormasyon nga posibleng magasaka sa congressional race si Sucro sa masunod nga eleksyon sa 2025.