KALIBO, Aklan — Agud nga masiguro ro eowas, maayos ag malinong nga pagdumdum it Pista Minatay, gin-umpisahan eon it Kalibo Municipal Police Station ro andang deployment, adlaw it Miyerkules, Oktubre 29 sa mga mabahoe nga sementeryo sa banwa it Kalibo partikular sa Kalibo Municipal Cemetery ag Medalla Milagrosa Cemetery.
Apang suno kay P/Lt. Sally Mar Bretania, tagapaghambae it Kalibo MPS nga iga-full force ukon paga-doblehon nanda ro andang on-ground deployment it police personnel sa Oktubre 31 hasta Nobyembre 2.
Raya hay bangud sa ginaeauman nga pagdagsa it mga tawu bukon eamang sa limang mga sementeryo sa banwa it Kalibo kundi maskin sa mga terminal it mga bus, simbahan, malls ag iba pang mga matawong lugar.
Magabutang man sanda it mga tawuhan sa mga police assistance desk, motorist assistance hubs ag mga nagapangunang karsadahon para sa public assistance ag emergency response.
Abiso nana sa mga naga agto sa sementeryo nga sundon ro ginapatuman nga patakaran eabi eon ro mga bagay nga bawae daehon agud nga indi madisturbo ro pamanawon.
Dugang pa nga siguraduhon nga naka-kandado ro mga baeay antes nga aywan agud nga indi mabiktima it mga manakaw.
