KALIBO, Aklan — Mabahoe nga breakthrough ro pagka-aresto sa suspek sa serye it mga paeanakawan sa banwa it Kalibo ag Numancia sa ginkasa nga hot-pursuit operation it Kalibo Municipal Police Station sa gina-istaran kara sa idaeum it tulay sa C. Laserna St. Kalibo, gabi-i it Miyerkules, Hunyo 26.
Suno kay P/Maj. Willian Aguirre, Deputy Chief of Police it Kalibo Municipal Police Station nga posibleng matuldukan eon ro misteryo sa likod it mga serye it panakawan nga nagakatabu.
Ginkilaea it mga awtoridad ro suspek nga si alyas “Deonard”, 49 anyos, residente it Molo, Iloilo ag temporaryong naga-istar sa nasambit nga lugar.
Nausoy ro suspek matapos nga maispatan sa Roxas Avenue, Kalibo.
Narekober halin sa suspek ro mga tinakawan kara nga items kapareho it mga aeak ag sigarilyo .
Ulihi kara nga ginsueod ag gintakawan hay ro restobar sa M. Laserna St. Kalibo ko Hunyo 24. Imaw man ro suspek sa panakawan nga natabu sa sangka baeay sa M. Laserna St. Kalibo ag Brgy. Tinigao kamana man sa sangka apartment sa Brgy. Estancia, Kalibo, sangka bodega sa Brgy. Bulwang, Numancia, pabahay sa banwa it New Washington ag iba pa.
Puro kwarta ag mga gamit nga madali nga mabaligya sigon ro anang ginatarget nga takawon ag owa nagaka-interes sa mga cellphone sa pagkabaeaka nga ma-trace bangud sa mga naka-install nga Global Positioning System (GPS).
Ginpatutukan sigon ni P/Lt. Col. Ricky Bontogon, hepe it Kalibo MPS ro insigidang pagsabat ag pagresolba it mga kapulisan sa nasambit nga insidente.
Sa record it suspek, natukiban nga dati eon raya nga may kasong murder ag robbery sa Iloilo ag matapos nga makahilway pagkatapos it daywang dag-on nga pagkakulong hay nag-balik sa Aklan.
Dugang pa nga nakatrabaho dati ro suspek bilang installer sa sangka glass and aluminum supply sa banwa it Kalibo.
Sa pihak nga parte, ginsaysay sigon it suspek nga napilitan imaw nga magpanakaw agud nga may ipang-gastos sa pagtuon it anang unga sa kolehiyo sa siyudad it Iloilo.
Sa makaron hay presenteng nakakulong sa custodial facility it Kalibo PNP ro suspek ag posibleng uman nga magapangatubang sa reklamong robbery.
