KALIBO, Aklan—Ginaplantsa eon it Kalibo Municipal Police Station ro mga detalye sa igapatuman nga seguridad para sa nagahilapit nga opening of lights ag paskuhan sa kapitolyo sa maabot nga Disyembre 6 .
Suno kay P/Lt. Sally Bretania it Kalibo MPS nga nakaangkon eon sanda it inisyal nga preparasyon agud nga masiguro sa publiko nga magiging maayos, malinong ag matawhay ro nasambit nga event.
Gina-finalize eon sigon nanda ro andang security plan ag deployment it mga personnel kaibahan ro mga force multipliers agud nga maabot ro target nga maging madinaeag-on ro okasyon.
Nasayuran nga nagpahaum ro provincial government it Aklan it serye it mga Christmas activities nga paga-umpisahan pinaagi sa opening of lights and pyro musical display sa December 6, alas-5 it hapon sa provincial capitol grounds .
