KALIBO,Aklan–Nakalatag eon ro security ag preparation plan it Kalibo Municipal Police Station angot sa nagahilapit nga selebrasyon it kapyestahan ni Sr. San Juan De Bautista.
Suno kay PLt.Col. Ricky Bontogon, hepe it Kalibo PNP Station nga haom eon ro andang hubo sa pagmonitor, pagbantay ag pagsikyar sa kaeowasan it publiko nga makipagbahin sa selebrasyon it misa, kaean-an sa kalye ag mga aktibidad nga igapatigayon it lokal nga gobyerno eabi eon sa mga baybayon.
May deployment it mga police personnel ag may mobile patrol nga maga-usisa sa kada lugar nga may aktibidad ag baybayon nga sakop it banwa it Kalibo.
Sa pihak kara, hugot nga ginadumilian ro pagdaea it mga bladed weapon, firearms ag card games.
Nagpadumdom man ro pulisya sa publiko nga maging mapagmatyag sa palibot eabi eon kon may mga importanteng kagamitan nga daea.
Samtang, antes nga aywanan ro panimaeay hay isikyar gid nga sarado raya ukon ibilin sa kaeapit-baeay nga masaligan.
