KALIBO, Aklan—Umpisa nga ginpasugtan ro pagguwa it mga menor-de-edad kaibahan ro andang mga ginikanan ukon guardian, haeos adlaw-adlaw eon nga ginadagsa it mga magpamilya ag magkabarkada ro Kalibo Pastrana Park.
Bangud kara, mas pang ginpabaskog it Kalibo Municipal Police Station kabulig ro ibang natungdan nga ahensya it gobyerno ro pagbantay sa palibot it plaza para masiguro nga ginasunod it mga pumueoyo ro minimum health protocols partikular ro pagsuksok it face mask ag physical distancing.
Haeos kada oras nga nagalibot ro mga otoridad para masikyar ro sitwasyon sa lugar.
Samtang, makita man sa mga itsura it mga unga ro manami nga yuhom bangud sa wakas hay uman sandang nakapamasyar matapos ro mahaba nga tyempo it pagtinir sa sueod it baeay.
Nasayuran nga bukon eon it mandatory ro pagsuksok it face shield sa mga enclosed nga business establishment ag pampublikong lugar sa Kalibo base sa nakasugtanan it Municipal Inter-Agency Task Force.
