KALIBO, Aklan—Naging negatibo sa illegal nga droga ag mga mataeum nga hinganiban ro ginpatigayon nga random ‘oplan galugad’ it Kalibo Municipal Police Station ag greyhound operation it Bureau of Jail Management and Penology ukon BJMP sa andang pasilidad sa Brgy. Nalook, Kalibo ko domingo nga adlaw.
Suno kay Jail Inspector Rolyn Malolos it BJMP-Aklan nga sa ginpatigayon nga paghaeughog it mga awtoridad sa parehong male ag female dormitory hay owa it anuman nga iligal nga drogang nakita ag iba pang mga kontrabando.
Ro pagpatigayon sigon it mas ginpabaskog nga oplan greyhound hay programa it BJMP agud nga maduea ro presensya it iligal nga droga sa sueod it presuhan.
Sa pihak nga parte, nagapabilin nga hugut suno kana ro andang patakaran sa mga nagabisita sa mga inmates agud nga masiguro nga owa it makaeusot nga mga kontrabando.
Samtang, ro iba pang mga programa nanda para sa mga person’s deprived of liberty ukon PDL’s it BJMP hay ro livelihood programs ag iba pang programa it TESDA ag Department of Education ukon DepEd agud nga sa oras nga makahilway hay may daea sanda nga nagakaigo nga mga skills para sa pagbag-o it daeagan it andang kabuhi sa guwa.
