KALIBO, Aklan—Duda ro kapulisan sa ginasugid nga hold-up ag abduction sa sangka ginang nga parent leader it 4Ps nga naboe-an it kapin sa P54,000.
Suno kay Police Major Belshazzar Villanoche, hepe it Kalibo Police Station nga nagakangawa sanda bangud sa mabuhay nga oras nga pag-iba nanda it mga gina-alegar nga holdaper kun sa siin idtu eon imaw ginbuhian sa porsyon it Brgy. Libas sa banwa it Banga.
Mag-eowas kara, nakitaan sigon nanda it inconsistencies ro anang ibang mga pahayag.
Madumduman nga nauna eon nga ginpahayag it biktima nga si Mrs. Emilyn Piano nga matapos nga maka-withdraw it kwarta gamit ro ATM it 20 nana nga mga kaibahan nga 4ps member hay nagbaktas raya pauli kun sa siin pag-abot sa porsyon it kanto it Roxas Avenue ag Veteranz Avenue hay may nagpundo sigon kana nga sangka tricycle ag ginsampit imaw para ihatod sa andang baeay.
Samtang nagapanaw hay may nagasunod sigon kanda nga sangka kulay puti nga van kung sa siin gilayon nga nagpundo ro tricycle ag dikara hay gintabunan ro anang ueo it tatlong ka mga persona nga ginaeakipan it daywang eaeaki ag sangka babaye ag ginpwersa nga magsueod sa behikulo.
Kat mabuoe eon sigon it mga suspek ro kwarta nga anang daea hay gilayon man imaw nga ginbuhian sa Brgy. Libas, Banga.
Bangud kara, ginpahayag ni Major Villanoche nga nagapatigayon pa sanda it maid-id nga imbestigasyon sa nasambit nga insidente.
