Ginklaro it Kalibo PNP nga sanda mismo ro nag-aresto pinaagi sa manhunt operation sa suspek nga si Mark Archie Torrefiel, 31-anyos it Brgy. Cajilo, Makato sa Brgy. Pinagbuhatan, Pasig City samtang nakahold sa Criminal Investigation and Detection GROUP (CIDG) NCRFU.
Suno kay PMaj. Jason Belciña, hepe it Kalibo PNP Station nga apisar nga nakipag-angot sanda sa nagkaeain-eain nga law enforcement agency apang uwa sigon it kasayuran ro CIDG sa kaso rason nga ginhueat pa ro katapo it Kalibo PNP para sanda ro mag-aresto kay Torrefeil.
Ginpahayag dugang ni Belciña nga pagkareport eagi sa krimen hay insigida sanda nga nagpatigayon it manhunt operation ag nakipag-angot sa mga taeatapan it pulisya nga posibleng pagaagyan it suspek hasta nga nakaabot raya sa Metro Manila.
Kabulig ro nagkaeain-eain nga law enforcement agency hay natrack nanda ro nakahamtangan it suspek ag madinaeag-on raya nga naaresto.
Kumpyansa si Belciña nga maipursige ro kaso nga Robbery with Homicide kontra sa nasambit nga suspek.
Samtang sa pihak nga parte, ginpaathag ni Belciña nga inde pwede maimponeran it kaso ro live-in partner ni Torrefeil nga si Kristina Oraba bangud nga uwa raya it kasayuran ag kahilabtanan sa krimen.
Gindaea eamang sigon imaw it suspek sa anang pagpaeagyo ag dikato pa eamang nasayuran it babaye ro makangiedlis nga krime nga anang ginhimo.