KALIBO, Aklan—Ginpasiguro ni Kalibo Police Chief Major Belshazzar Villanoche nga padayun nanda nga pagatutukan ro kaso it 22 anyos nga si Nadynne Faith Medina.
Matapos suno kana nga mabasura ro kasong murder nga andang ginpasaka kontra sa suspek nga si Rannie Vicente bangud sa nag-eampas nga reglementary period hay iga-refile nanda ro kaso pinaagi sa regular filing.
Makabig sigon raya nga maeawig nga proseso bangud nga nagakinahangean pa it preliminary investigation, kun sa siin, iga-determina it piskalya kon may mabakod nga rason agud nga pasakaan it kaso ro akusado sa korte.
Magatipon pa gid sigon sanda it dugang nga mga ebidensiya agud nga mapabaskog ro kaso.
Gindugang pa ni P/Major Villanoche nga sa oras nga ma-refile ro kaso, pagahueaton kara nga magguwa ro warrant of arrest it korte kontra kay Vicente agud nga imaw hay maaresto ag mapasabat sa kasong nakomiter.
