KALIBO, Aklan–Bangud sa ginaeauman nga pagbalik it mga estudyante sa eskwelahan sa nakataeana nga in person classes, nakahaom eon man ro deployment plan it Kalibo Municipal Police Station para sa pagsikyar it peace and order sa unang adlaw it klase sa mga pampublikong eskwelahan sa adlaw it Lunes, Agosto 22.
Suno kay PLt. Aubrey Ayon, deputy chief of police it Kalibo PNP nga kapin sa 25,000 students ro ginatantya nga magabuhos sa mga nagapanguna ag daeagkuan nga eskwelahan sa banwa it Kalibo.
May kaangtanan kara, may pili ka mga eskwelahan nga pagabutang it police assistance desk nga magaalalay sa mga ginikanan ag estudyante.
Ginpadumdom man ni PLt. Ayon ro tanan nga inde magkahadlok nga magpaeapit sa mga kapulisan sa oras nga nagakinahang-ean sanda it bulig.
Samtang sa pihak nga parte, mas pang ginhugtan ag ginpabaskog it mga otoridad ro implementasyon it curfew sa banwa it Kalibo.
Ginpahayag ni PLt. Ayon nga antes pa man ro executive order nga ginpaguwa ni Kalibo mayor Juris Sucro hay may ordinansa eon sanda nga ginapatuman ag mas pa raya nga ginpasanyog sa ginapapatuman ng EO it alkalde.
Bangud kara, ginhinyo ni PLt. Ayon sa tanan nga mga menor de edad nga magsunod sa laye ag magkooperar bangud nga haeos kada gabie hay nagalibot ro andang mobile patrol.
